1Th 2 | APZ | STEP | Nje a'amu kuyoho. Sekwo huno seyohoho. Nakwo sekwo'njopo nohumentani nakwoe syoho imentɨhwoneso fiyo po'mentiso'maho. O'o, ne imo'nɨmentisofoho.

1 Thessalonians 2

Poul Tesolounika sopo nohumanto yo'mayo syoho imentisofoho.

1 Nje a'amu kuyoho. Sekwo huno seyohoho. Nakwo sekwo'njopo nohumentani nakwoe syoho imentɨhwoneso fiyo po'mentiso'maho. O'o, ne imo'nɨmentisofoho. 2 Nakwo ango Filipainta'ango sekuyepono pmmentɨhwonefoho. Filipai humentanɨngkuhwone sɨtofo nalɨmentohofoso tohino engo ma'mentɨhwone so'no sekwo huno moi'wonoho. I oso'no nakwoe Anɨtu kako kakoe yokumpohn'nyo nakumo nejopahonɨngki yo'mayo hwahoponjo somne'no iyoho monanyofoho. O'o, nakwo sekuyepono Filipainta'ango sohwona'ni nopahonɨngkuhwoni a'amu pi'nɨngo nakwolaho ko nelahonɨngkofi nakwo Anɨtuye hungkuno selɨmentɨhwonefoho. 3 Oso hungkuno selɨhwoneso hwasyo hungkuno'nji selɨmentɨhwone'maho. O'o, nehopi'nohini selɨmentɨhwonefoho. Hungkuno hiloso selontani wonyo honɨngkano imo'mentɨhwone'maho. O'o, wopɨngo'nohini selohofontani Anɨtuye hungkuno selɨmentɨhwonefoho. 4 Anɨtu nakumo yamofo nto naloho'mentisofoho. Yamofo nalohofonto nalɨmento, Nje hungkuno ujo'ne sohwasi hoponoho, nalɨmentiso oso'no lɨjwaofalokuhwono. Hungkuno hiloso a'amufe sɨmeho wopɨngo umo'nyo'ne mulalokuyɨhwono. O'o, Anɨtuye sɨmeho wopɨngo umo'nyo'ne yalokuhwono. Anɨtu nakwoe sɨmehomo fe'nonehonalofoho. 5 Sekwo huno moi'wonoho. Nakwo sekumo afofo masemokummentɨhwono. Awonoho. Nakwo sekwoe hamniyoho mayo'ne selɨmentɨhwone'maho. Olo hilo so'no Anɨtu huno uyohoho. 6 Sekwo'nji nom'ne a'amu so'nji nakwoe yofe ho'nomayo'ne miyalokuyɨhwono. I oso'no nakwo Jisas Kɨlaisɨye syoho ulohofiyo (apousel) hwona'nyoho. 7 Oso hiso'no nakwo syoho engo sejopontontasi hoponesohilo. I sekwo'nji nohumentanɨngkuhwoni sohonta nakwo moya'mi kakoe mehomimo wonyohofiyo esyohumawo'nɨngkiso hopaso esesyohumamentɨhwonefoho. 8 Nakwo sekune'no sɨmeho nehopi'nohini sejapmmentɨhwone so'no nakwo Anɨtuye hungkuno wosejopantani imentɨhwonefoho. Oso'nohini'maho. Oso syoho yontanɨngkuhwasi a'amu hofɨko nakumo nonahonɨngkuji nakumo fonjonasyontɨfijontentesi wopɨngo'nesohilo. Hwapɨngoso nakwo sekune'no sɨmeho nehopi'nohini sejape so'nefoho.

9 Nakwoe a'amu soku, nakwoe syoho tohohmtnno'njo iyoso'no sekwo huno moi'wonoho. Anɨtuye hungkuno ko selontani nakwoe wosopayo yo'mayo so'no mpe iyo'ne nakwo sɨkwo'miyomo mofehi'nyo'nji hamniyoho'no syoho yokumpohn'nyo imotɨhwonefoho. Sekwoe wosopayo yo'mayoso siki mayoso'no nakwolaho lɨmentɨhwonefoho.

10 Sekwo nakwoe yahinoso nto nahonɨmentohofofoho. Anɨtu huhwo nto nahonɨmaho. Sekwo Anɨtumo sɨmeho hi'ntnnono uyalokwofo sɨkunonji sekwo'nji nohumentani nakwo Anɨtuye honɨngkanomo inɨngkowentani wopɨngo'nohini humamentɨhwonefoho. Wonyo honɨngkano mimmentɨhwonefoho. 11 Hwe fihwo kakoe mehomimo wopɨngo ulohofɨwo'nɨngkiso hopaso nakwo sekumo wopɨngo seloho'mentɨhwonefoho. 12 Anga'no anga'nohino sokumo Anɨtuye hungkuno losetɨhwentani huno sefohotofontani sekwoe humayo somo yokumpohn'nyo semokumentɨhwonefoho. Anga'no anga'nohino sokumo Anɨtuye sɨmeho wopɨngo umo'nyo so'ne nakwo honɨngkano wopɨngo'nohini inɨngkayo so'ne lutɨhwamentɨhwonefoho. Anɨtu huhwo sohwo ole selalofoho. Nje angopo nɨ'mapmno. Nje yo'mayo wonyoangkafoso sekwo'nefoho. Sekwo ngkimo enjwa'mo fosyohumafɨkujo'no ngko wosemokosyohumamonnoho. Ose selalofoho.

A'amu Anɨtumo sɨmeho hi'ntnnono nehopi uyontɨfi yokumpohn'nyo lohofontɨfi tango engo tɨpema'mentohofofoho.

13 Nakwo Anɨtuye hungkuno selontanɨngkuhwoni sekwo ole monajofoho. Olo hungkuno loso hwahoponta'angofoho. O'o, ose monajofoho. Nakwoe hungkuno nupa'nontɨfi Anɨtu mta'angofoho lɨmentohofofoho. Ou nehopi. Oso hungkuno Anɨtu nejapmmentisofoho. Oso'no hungkuno hilo somo sekwo nupa'nɨngkahonɨngkofi sekwoe sɨmeho mo'mo hungkuno hiso'no Anɨtu kako huno fohotofohotofo selohofahonɨngki sekwo honɨngkano songomo inɨngkamentohofofoho. Oso hiso'no nakwo Anɨtumo isamoyoka ulɨwo'nɨngkuhwonefoho. 14 Nakwoe a'amu soku, a'amu hwaho Jutiya humamotofoso hofɨko nakwoe Hwe Engo Jisas Kɨlais osohumo sɨmeho hi'ntnnono uyalokwofo somo yo'mayo u'ma'mentiso pa'nyoso olohonta sekumo se'malofoho. A'amu Jutiya humamotofoso Jisasɨmo inɨngkawo'nɨngkohofo so'no hofɨkoe a'amu mta'ni tango engo ma'mentohofofoho. Oso hopaso sekwo sekwoe a'amu mta'ni tango engo tɨpemalokwofo. 15 A'amu Jutaso Jisasɨmo mohumayo'njoso hofɨko a'amu Anɨtu hungkuno uyahonɨngki lɨmotofo sohwamo fonjasyontɨfi tɨfinepo nakwoe Hwe Engo Jisas Kɨlais sohumo fonjahumentohofofoho. I hofɨko nakumo wae enamo'mentohofofoho. Hofɨkoe yahino wonyo so'no Anɨtu ngkilaho lalofoho. A'amu huhwo sohwa hofɨko hwe moya'mi hopi'nonohino sofe mango hwafoho. 16 Oso'no a'amu Jutamnohino'maso, o'o, a'amu temtitofo kengo kengo somo nakwo Anɨtuye hungkuno walutɨhwantane yahonɨngkuhwoni hofɨko nakwoe honɨngkano pɨjwonemofalokwofo. Oso'no a'amufe mangohwa pa'nyo imo'nɨmentohofofoho. A'amu Jutaso ole lalokwofo, A'amu kengoso Jisasɨye hungkuno upa'nyo so'no nakwolaho lalokwofo. Oso'no hofɨkoe wonyoso engo hopa nto yao'maho. Oso hiso'no Anɨtu kako hofɨkine'no sɨmeho tohino umnalofoho. Tohino engo wotɨpemantɨfeho.

Poul kako Tesolounika a'amu somo apa'no uhwonɨmo syafɨhu'mentisofoho.

17 U nakwoe a'amu soku, a'amu Juta sekuyepono nakumo wae enao'mentohofo sohonta nakwo hwaho nom'nepo nohumentani sekune'no huno sosyefɨsyontani nakwo sɨkumehomi pa'nyo humamentɨhwonefoho. Sekwoe sɨmano masehonyo'njo yontani i oso'no nakwoe hunoso sekune'no sosefɨsyalokuhwono. Nakwo sekumo se'mane'entani syoho engo yalokuhwono. Nakwo nakwoe sɨmeho so'mo hofɨkimo uhwonano syofɨsyalokuhwono. 18 Nakwo sekumo wose'mantane'no yɨhwono. Ngko Poulɨ'ni sɨkuno engolopohamo wose'ma'mo lonji ko imoteso i Seten kako nakumo pɨkupɨjo naloho'mojofoho. 19 Hwangku nakwoe Hwe Engo Jisas asomo poso sohonta nakwo kakoe sɨmanopo lohofanefoho. Oso hohosohonta nakwo yo'mayo wonyoangkafo tɨpemane so'no huno mosyofɨsyalokuyɨhwono. O'o, sekwo nakwo'nji oso hopo lohofane so'no syofɨsyontani sɨmonyo yalokuhwono. Jisas kako sekumo sehonɨngkuhwosi nakwoe syoho ne imo'nyo so'no huno uyonefoho. 20 Sekwoe yahino wopɨngo so'ne syofɨsyontani Jisasɨye yofe ho'nomalokuhwono. Oso'no sekumne'no nakwoe sɨmeho wopɨngo namo'nɨngkohoho.